وابتغوا الیه وسیله...

ای بی خبر! دئمه که بو چرخون وفاسی وار

بیر ذرّه یؤخ وفاسی ولی چؤخ جفاسی وار

فانی دیوب جهانی، خداوند کردگار

«افٍّ لَکَ »، بویوردی خـردمند روزگار

لفظ مؤنّثیلـــه تاپوب  بسکه  اشتهار

بیر ساعتی اگر سنیلن اولسا باوقار،

                          شاد ائتمه قلبووی، دئمه یاخجی حیاسی وار

 
زینت وئروب، مزیّن اولار لاله زاریلن
باغ و بهار و گلشنِ زرّین نگاریلن
«المالُ والبَنـونیلـه»، یعنـی جلالیلن
پژمرده تئـز اولوب،سولار،آیات فانیلن
                         هانسی گولون، خزاندا عزیزیم صفاسی وار؟

گؤر بو جهاندا کیم لر عزیزیم ائدوب سکوت؟
فکر ایله، بیر فقیر و غنی گؤر اولوب ثبوت؟
یتموبدی سمعـووه مگر آیات عنکبوت؟
  خالق جهانی فرض ائلیوب «اوهن البیوت»

                                     چون تار عنکبوت دی آیا بقاسی وار؟

میعادی ائت قبول‌، چؤخ آختارما شهـرتی
ائت قلب دن کنـــار دخـــی بـو جهــــــالتی
قلبـــونده پایـــدار ائلـــه آیــــات رحمتـــی
کسب حـــلال ایلــه، قبــول ائت عبـــــادتی
                           ظلم ایله سون، مسـلّـم اذیّت جـزاسـی وار

آچســـان اگر الـــون بو جهـــــاندا اذیّتــــه
فـوراً ملـک اونـی یازاجاقـــدور کتـــــابتــه
پرونده ایچـــره اؤلدی ذخیــــره قیــــــامتـه
گر توبــون اولسا دوشمیه جکسن ضــــلالته
                        بی تـوبه گئت، ولی دئمه دردیم دواسی وار

سـال یادووه ســـن آیـــه ی «مثقــــال ذرّة»
« خیــراً یــره»،هامی اؤخویوبسوز حکایتنین
ائت توبه، خیر عمل ائله سون  وارشفــاعتین
خیرین گؤررسن حشرده، چؤخ چؤخ جلالتین
                            ظلمــون اذیّتی،ولی خیـــرین صفـاسی وار

طغیــــان ائدوبدی نفسـون اگر،چؤخ نصوح وار
ائت رشتــه های توبه نی، قلبـــــــونده استـــوار
ایله عبـــادت، آغـــلاگینــــــان زار و دلفـــکار
«لا تقنطـــوا» دئیــوبدی خـداوند، رحمــی وار
                      یؤخ سنده شرم، خالقـون امّا حیاسی وار

بسکه« فقـد غفـرت» دئـوب حیّ لاینام
بوآیه نی تلاوت ائـدوب جمـله خاصّ وعام
آختـار وسیله تاپ، عمـلون خیر اؤلا تمام
چون« وابتغـوا الیه» دئیوب اؤلما چـؤخ عوام
                             مقصودی وار بو آیه ده بیـر مـدّعاسی وار

مقصودی سیّـد دو ســرا، ختـم انبیــا
بیـرده علی ولیّ خـدا،  شـاه اوصیـا
بیر مقصدی‌، یانان قاپوسی، خیـرةُ النّسـاء
مسمـوم اولان یانان جـگری،یعنی مجتبی
                              بیرده حسین که، عرش خـداده عـزاسی وار

پنجم حسین دی که اؤلارین سیندی لشگری
کرببـلاده اؤلدی اؤنـــون نــورس اکبـری 
حقّه فدا گتوردی عبـا ایچـــره اصغـری
اؤل شیرخوارون حالینه ، آغـلاتدی لشـگری
                        حلقین ده گوردولر که اؤنـون اؤخ یاراسی وار
 
بیــرده باخـاندا گؤردی اؤ سلطان کربلا
خوردا بالاسی ، اللرینی آچدی صاق صولا
آچدی ایکی گؤزون اؤ گؤزون آچمیـان بالا
دوتدی جهانی زلزله تا عرش کبـریا
                                 اهل سماده ایندی ده، آه و نواسی وار
 
گؤردی اوچـوبدی روحی نئجه آغلادی حسین
قان لختـه سیله ، گؤزلرینی باغلادی حسین
ال اوسته اؤخلی اصغرینی ‌، سـاخلادی حسیـن
لای لای دیوب نئجــه اؤره گین داغلادی حسین
                        قتلگه ایچره، ایندی ده لای لای صداسی وار

چکدی اؤخون قوجاقه اؤنی آلدی آغــلادی
اصغرآناسینی، یادینـا سالدی آغلادی
اوچ دفعـه تلّه جن یازیلوب گلدی آغلادی
اؤردا رباب ناله سینی، بیلدی آغلادی
                          گؤردی کنار خیمه ده، آغلار آناسی وار

ناچارگلدی قتلگهه، بیـرده شاه دین
دوردی شهید لر آراسیندا، اؤ دلغـمیـن
بیر بیر مخاطب ایله دی،‌ باش سیـز بدنلرین
گه عـون و فضل و جعفــر و شهـزاده اکبـرین
                    گه قاسمی چاغیردی،که قاندان حنـاسی وار

گلــدی نـــوا و شیـونه عبّـاسی سسله دی
یانـــدی بلالی بیر غمـه،‌عبــّاسی سسله دی
اوز دوتدی نهــر علقمـه، عبّـاسی سسله دی
باخـدی اؤ قانلو پرچمـه، عبـّاسی سسله دی
                      بیر یاندا قانلو مشکیدی، قانلـو لـواسی وار

باسدی اؤ وقت سینه یـــه، سـروِ صنــوبرین
گتـــدی کنـــار قتلگهـه، غنچـه ی تـــرین
اؤلدی پیـاده، قویـدی یره اؤخلـی اصغــرین
بیر قبـر قــازدی، دفن ائله دی ناز پــرورین
                    کیم دور حسین کیمی غم بی انتهـاسی وار؟

مختــاری یازموسان یئتیـروب دؤرده ساعتی

صبحـه یاخیندی، وار بو زمانــون شـرافتی
درد دلون دئ اصغــــره،  ایستــه زیـارتی
باک ائتمه، حشـرده ائدر اصغـر شفاعتی
                          اصغـر اوشاقسادا، اؤنون عمده سخاسی وار

«زنده یاد: شیخ احمد مختاری»